Dit is vandag Valentynsdag! Skep 'n romantiese atmosfeer en verleen bekoorlike sjarme en skoonheid aan jou tuin deur jou met rooi blomme en bloeisels te omgewe.
|
Wat is die kleure van romantiek? Elke persoon het kleure wat hul met romantiek asook die spesiale oomblikke in hul lewe assosieer. Sommige mag delikate pastelkleure verkies, maar die meeste mense verbind romanse met die ryk skakerings van rooi en karmosyn. Die mees romantiese plek in die wêreld mag selfs in jou eie tuin wees waar donkerrooi rose 'n liefdeslied aan die bome fluister, 'n digterstuin waar 'n tuinboog verborge tussen geurige rose pronk of waar maanlig in die stil waters van 'n poel weerspieël word. Heelwat blomme simboliseer liefde en romantiek deur hul geskiedenis, geur, blomtaal of kleur. Die lewe is 'n tuin waar romantiek deur hierdie plante versinnebeeld word: rooi rose - liefde, rooi kamelia - jy is 'n vlam in my hart, angeliere - verknogte liefde, dahlia - vir ewig joune, rooi angeliere - suiwere liefde, en celosia - het jy my lief? Onthou dat kleure in 'n tuin nie geïsoleer is nie en mag in verhouding tot ander kleure verander. Dit kan selfs verskil namate die intensiteit van die lig op verskillende tye van die dag verander. Die naasgroeiende plante van verskeie kleure sal mekaar ook beïnvloed en die algehele effek verdiep of verflou. Idees vir plante
|
|
